١/ ٢٠ دقيقة يوميا تتكلم فيها مع ابنك حوار صداقة..من غير نصح ولا توجيه ولا كلام عن واجب ولا امتحانات ولا مدارس..
2/ ٣ دقائق يوميا لتثبيت القيم قبل النوم وتشجيعه.. (فرحت بيك اوي النهاردة وانت بتعمل كذا..لما ساعدت اختك كان تصرف راجل .. كنت جميل لما وفيت بوعدك ..)
3/ مدحهم يوميًا أكتر من مرة..على أي سلوك إيجابي عملوه..
4/ عبر لهم عن حبك ومشاعرك الحلوة تجاهم يوميًا أكتر من مرة..
5/مدحهم يوميا أكتر من مرة على شكلهم..ابتسمتك حلوة..عيونك جميلة..شعرك يجنن.. ودانك ظريفة..
6/مرتين في الاسبوع مشاركتهم في اي حاجة خارج البيت..ولو 5 دقايق تمشية..جري..تشتري ايس كريم ..تزوروا حد قريب او صديق. .لفة بالعربية..
7/ مرة او مرتين على الأقل عشا او غدا مع بعض في البيت او برا البيت. .المهم القاعدة تطول وحوار متبادل ..
8/ جملة ( كلي أذان صاغية ) دي مش بالقول..دي بالفعل..تقعد من دقيقة ل 3 دقايق مع ابنك في مكان هادي واطلب منه يقول اللي هو عاوزه.. وتسمعه وبس من غير قيود ولا رد ولا تعقيد ولا مقاطعة..وتنتهي القاعدة بعد ال 3 دقايق..
9/ التعبير له عن حبك تعبير عملي ..بنقتدي بسيدنا وسيد الخلق اجمعين..الرسول صلى الله عليه وسلم… كان كل ما يقابل السيدة فاطمة الزهراء يقبلها في يدها وجبينها ..في بيته ومسجده..وقدام الصحابة. .
المسه..
**المس راسه من الخلف ( رأفة ورحمة )..
**حط ايدك على راسه (فخر)..
**ايدك على جبينه( تهديه)..
** ايدك على خدوده ( شوق)..
**امسك ايده .. ( تقوي العلاقة والحب)..
لو حسيت انه غضبان ومشاعره سلبية..امسح بايدك على صدره..
القبلات مهمة جدا
قبلة على جبينه بتستقبله..على خدوده تعبر له انه وحشك..
على رأسه تحسسه انك فخور بيه..
بوسة في ايده حب وشوق ومقابلة حنينة..
10/ احضن ابنك او بنتك..الحضن على الأقل 4/5 مرات في اليوم ..بتعزز ثقته بنفسه وبتحسسه بالأمان وانك موجود وانك بتحتويه..
** الكلام اللي فات دا للأب وللام..وللاب اكتر لانه مصدر الأمان للأبناء..سواء بنات او أولاد..
ابنوا علاقاتكم مع ولادكم عشان يكبر بين ايديك ابن مطيع على خلق..بار بيكم..
بكدا هاتبني شخصیته وهاتتعرف على نفسيته وداخلياته..وهاتبقا نموذج الاب المثالي وقدوة له لو كان ولد..ولو كانت بنوتة هاتبقا بالنسبة لها نموذج الزوج اللي تتمنى تتجوز ذيه..عشان كدا بنلاقي بنات تقول عاوزة اتجوز واحد زي بابا..
لما تعمل كدا ..هاتلاحظ تغيير ابنك وهاتتلاشى المدمرات اللي كانت سبب في عنفه وعناده او اضطراب شخصیته..او مراهقته المزعجة..او لا قدر الله انحرافه..
((شكرا ان ولادنا موجودين في حياتنا ))
رصد ومتابعة : رؤى عطا
