تتابع وترصد مجلة المرأة الفلسطينية والعربية أنت لها كل ما ينشر ويمكن الاستفادة منه في تطوير قدرات النساء والفتيات في مجال الإبداع والاعتماد على الذات والنجاح المتميز وتنقلها كما جاءت على صفحات ومواقع روادها ومنها قصة المبدعة والريادية صفاء حوراني التي رسمت خريطة إبداعها بحروف من ذهب وشكلتها بطريقتها من أساليب تدريس اللغة الإنجليزية لعالم الكيماويات وخاصة الصابون. ونتركم مع قصتها..
السلام عليكم….
لكل متابعيني الجدد اللي بسألوني كيف بدأت وإيش شغلي.. وبعض التفاصيل… بحب اشرككم بجزئيه من قصتي… وبحب كتير لما تحكولي ألهمتينا وبدأنا نشتغل بشو بنحب..
تابعوا جزء من القصه 😊👇👇
أنا صفاء فوزي أبو حجه (حوراني) من العطاره قضاء جنين.
خريجه بكالوريوس أساليب تدريس لغه انجليزيه… فرع طولكرم…2009
درست هالتخصص وأنا متزوجه وعندي طفل كتحدي لنفسي ولأنه كان وقتها نادر الخريجين من هالتخصص… بس لما دخلت الجامعه وشفت الكم الهائل اللي فكروا متلي للانضمام لهالتخصص… تخيلت الطابور الطويل بالتعيين بسلك التربيه والتعليم…ومع هيك كملت وانا مبسوطه لانه لغه فتحتلي المجال للتواصل مع العالم كله…
تخرجت وتوكلت على الله وقدمت بالتربيه في السنه الاخيره من الجامعه وارفقت شهادتي فيما بعد وكان مسموح هالشي… وابدعت في الامتحان وبالمقابله ولكن…….
المهم درّست بروضه صف التمهيدي وكنت مديره ومعلمه على حوالي ٦٠ طفل.. تجربه علمتني كتير واستمريت ست سنوات… وكمان لا زلت بقدم بالتربيه🙄
وكنت بنفس الفتره متطوعه مع الرؤيه العالميه في برنامج التكافل للاطفال… وفي برنامج صحي كمرشده صحيه ميدانيه للامهات الحوامل… وهاد الشي استمر 10 سنوات من التطوع…
بالإضافه لدورات كتيره وتدريبات…. زهقت من التقديم في التربيه… وشفت اشيا كتير ما عجبتني في عالم الواسطات… فتركت وشلت ونزعت فكره التقديم للتربيه من راسي وتركت كل شي… وفكرت بفكره لمشروع كان براسي من زمان كتير وناطر انفذه… وهاد بسبب حبي وعشقي للطبيعه بكل تفاصيلها… فأنتجت منتجات تجميليه طبيعيه… خاليه من المواد الكيماويه… بتخص كل الفئات… وبتحل كتير مشاكل…
كتير اعتمدت في تعلمي علغتي الانجليزيه… فدرست موسوعات وتواصلت مع خبراء اجانب…
بعد ما صار عندي تعدد بالمنتجات… اسست شركه سميتها soft drop لمنتجات صفا الطبيعيه… وسجلتها في وزاره الاقتصاد…. وهلا عندي علامه تجاريه مسجله بإسمي Safa…وعلامتي التجاريه صارت في كتاب الملكيات الصناعيه في كل العالم
وعندي اكتر من ٢٠٠ منتج بين الصابون والكريمات واللوشنات… والشامبوهات.. ومزيلات العرق وووووو وكل ما يخص البشره والشعر والجسم…
وحالياً معي دبلوم خبيره بشره… ودبلوم حجامه نبويه وطبيه.. ودبلوم مساج طبي واحجار ساخنه… وشمع هوبي…
ولأنه شركتي مسجله مواد تجميليه ومنظفات… معي شهاده خبيره تصنيع منتجات تجميليه طبيعيه وشهاده خبيره تصنيع منظفات من( الاكاديميه الامريكيه… والاكاديميه السوريه… والاكاديميه الأردنيه) … ومسجله عندهم..
وحالياً عندي مقر شركتي في جنين… ولانه شركتي كمان مرخصه للخدمات التدريبيه فحالياً بدرب الصبايا وكمان الشباب على امور كتير في عالم الرياده… ومنها فنون تصنيع الشوكلاته بكل انواعها لمنافسه المنتج المستورد….ولخلق صبايا وشباب اصحاب مشاريع ويدخلوا عالم رياده الاعمال… ودورات في تصميم العطور.. ودورات متنوعه ومبتكره وغريبه وغير مستهلكه.
ولا زال العديد من التدريبات القريبه سيتم عرضها قريبا….
طبعاً عندي مقابلات صحفيه كتيره في عده تلفزيونات وعالميه متل تلفزيون الجزيره والصين…
ومقالات في صحف ومجلات متل زهرة الخليج… ومقابلات راديو محليه وعالميه متل لبنان….
وعندي مندوبات بسوقوا منتجي الفلسطيني وبحمد الله انه الي دور في رفع همم الناس ليكونوا مؤثرين… ومنتجين… ولاتاحه الفرصه الهم لاعاله عائلاتهم وانفسهم…
كل الشكر لجامعتي القدس المفتوحه اللي اتاحتلي فرصه التعلم رغم كل الظروف المعيقه….
وكل الشكر للتربيه والتعليم اللي ما تعينت عندهم لمده ٧ سنوات متواصله….لولا عدم تعييني كان انا معلمه تنتظر الراتب وتمضي اجمل سنين عمرها بالإنتطار للتطور…
وكل الاحترام لكل معلم ومعلمه…
عافانا الله واياكم من كل بلاء وابتلاء… وجعلنا في وطننا من السعداء…
بعتذر للإطاله الشديده 😁✋✌️
